Det glade gospel-ljoset vil skine sterkt i Nedstrand kyrkje når pianist og dirigent Øystein Lund Olafsen tek med seg ei gruppe frå Bømlo Gospel og inviterer til konsert. Det blir ein time fylt med ei blanding av amerikansk gospel, åndelege songar og kjende og kjære salmar. Kanskje byr dei òg på litt allsong?
Bømlo Gospel, kjend for sin kraftfulle song og engasjerande framføringar, gler seg til å dele musikken sin. Dette er eit flott høve for alle musikkentusiastar til å samlast og
nyte ein kveld med soul, gospel og fellesskap.
Øystein Lund Olafsen er utdanna kyrkjemusikar frå Noregs musikkhøgskole og har arbeidd som kantor i Bremnes og Lykling sokn på Bømlo sidan 2019. Frå 2001 til 2018 var han tilsett som kantor i Lommedalen kyrkje. Han er òg dirigent og musikalsk
leiar for Gospelkoret HIM (Oslo).
Gjennom 30 år har han arbeidd med ein stor del av den norske artisteliten og arbeider meir eller mindre fast med mellom andre Elisabeth Andreassen, Hanne Krogh, Ole Edvard Antonsen, Alexander Rybak, Maria Arredondo og Torstein Sødal, Christian Ingebrigtsen, Gaute Ormåsen, Sissel Kyrkjebø med fleire.
Øystein var òg fast musikar og kapellmeister for Jan Werner Danielsen i nærare ti år.
Elles har han hatt ansvar for innslag under The Nobel Peace Prize Concert gjennom fleire år, og arbeidd med internasjonale artistar som Josh Groban, Kurt Carr, Seal, Barry Manilow og Stevie Wonder. I tillegg til den utøvande verksemda si arbeider han òg som arrangør, komponist og produsent.
Velkommen til konsert!
Det er ikkje billettsalg, men støtt oss gjerne på Vipps 700775.
Arrangør er Nedstrand kyrkjeforum
